J’e li de qai pas ghere engaijant, Gllaome, su les aneys a veni, un articl su les sciencës de LEAP Europe 2020.

Y a sciencës e sciencës. Faot pas tourjou lou fére fond. Garde don, la crize, come on dit, y a-ti hardiment de monde savant a l’avair veû veni ?

Nouna. Més, justenément, eutcite l’avaen deviney. Deça, je fes cas de ce q’i disent pour la sieute. La crize  ét lein d’étr au bout.

Le monde du G 20 devent s’entevair le 2 du maez d’avri, tout come. I vont fére qhoqe choze, pas possibl !

Une supozicion q’i feraen ce qi faot pour erbouter la finance e l’economiy. Y a core une aotr berouey q’ét pour nous chére su la goule, c’ét la qhession du climat.

Alôr qhi q’i faot fére ?

Si t’es dan un peys oyou qe y a de l’Etat bravement, ça jouera a meitië, més si la n’ét pas de méme e q’au parsu le monde ont des fusi tant qe pus, le mieu d’après yeûz, c’ét de decaniller. Deja, y a des Ameriqheins qi s’olandent en Urope.

Le Vieû Continent araet cor du bon alôr ?

Faot creire. «J’avons des ideys» a mode des aneys 70 du temp de la permiere crize du petrol. Jean-Pierre Coffe vient de bani un livr : «Coment s’en chevi o 9 uros de jou a nouri 4 persones». D’aotr etou ont sonjë a eïder a lou semblabl, c’ét les préchous de Caréme a Noter-Dame a Paris.

Pourqhi don ?

Il ont z’eû le nez creûz : le suji st’aney c’ét le jeûne.

Ça moralize !